La costumbri qu'oi conocemus comu Fueru del Baylíu ya veníassi prahticandu n'Olivença dende bastanti antis del su sometimientu al Bayliatu de Hereç de los Caballerus en 1279, pues era ya posseía polus Caballerus templarius por direchu de cunquista. Probablementi h.uessi'l rei de León Alfonsu IX quien, nel su labol de recunquista pola región ahtual d'Estremaúra, cuncedió istas tierras a l'ordin del Templi a fin de que h.ueren pob·lás y cultivás, pa evital desti mou que l'imprecissión ena línea fronteriça cun Portugal puiera determinal la su ocupación lusa. La "costumbri innominá" passaría a llamassi Fueru del Baylíu cuandu'n 1279 passó a dependel de la hurisdición elesiástica del Obispáu de Badahoç.
Sigui respetándussi'l su usu n'Oliva de la Frontera, Hereç de los Caballerus y las sus pedanías, Villanueva del Fresnu, Valencia del Mombuei, Zah.inus, H.iguera de Vargas, Alconchel, Chelis, Valli de Matamorus, Valli de Santa Ana, Burguillus del Cerru, Valverdi de Burguillus, Atalaya, Valencia del Ventosu, Fuentes de León, Olivença y los sus agregaus, Táliga, Alburquerqui y La Codosera.
El Fueru afehta esclussivamenti al régimin económicu-patrimonial y cunsisti ena comunicación de tolus bienis aportaus polus desposaus y ena su posteriol partición por metá al liquiassi la sociá cunyugal. Istu é, la custumbri nu distingui ente bienis privativus y ganancialis, y estableci que los esposus tiein de disponel del patrimoniu común n'igualdá de cundicionis, ensín tenel en cuenta lu aportáu por ca unu.
Aplicación ahtual del Fueru del Baylíu
Enus pueb·lus undi regía'l Fueru venía acatándussi traicionalmenti'l prencipiu de la personaliá, d'alcuerdu cola lei de l'esposu - la custumbri tendría d'aplicassi a los matrimonius enus qu'el maríu fuessi aforáu, se celebrassi ondi se celebrassi.
Tolus autoris alcuerdan destacal la solidariá que sta fechá nesti tipu regímenis matrimonialis de comuniá universal de bienis. É evidenti qu'el Fueru beneficia siempri al cónyugi qu'aporta menus bienis al matrimoniu.
La comunicación de los bienis debía prouzissi nel momentu'n que se cunsumaba l'enlaci ente los cónyugis, anque los vizinus nu supieran mu bien si istu ocurría ena celebración del matrimoniu por parabra de presenti o enas velacionis. La costumbri incidía sobri to cuandu se dissolvía'l régimin, bien h.uera por muerti o por separación matrimonial. En dambus casus la partición efehtuábassi conformi a las direhtricis del Fueru.
Las escasas renuncias al Fueru que se prouzían demuestran qu'ésti era acehtáu de buen grau polus municipius ondi s'a tiníu aplicáu h.asta l'ahtualiá.
PRERROMANU.