El embargo
Señol jues, pasi usté más alanti
y que entrin tos esos,
no le dé a usté ansia,
no le dé a usté mieo...
Si venís antiayel a afligila,
sos tumbo a la puerta. ¡Pero ya s'a muerto!
Embargal, embargal los avíos,
que aqui no hay dinero:
lo he gastao en comías pa ella
y en boticas que no le sirvieron,
y eso que me quea.
porque no me dió tiempo a vendello,
ya me está sobrando,
ya me está gediendo.
Embargal esi sacho de pico,
y esas jocis clavas en el techo,
y esa segureja
y esi cacho e liendro...
¡Jerramientas, que no quedí una!
¿Ya pa que las quiero?
Si tuviá que ganalo pa ella,
¡qualisquiá me quitaba a mi eso!
Pero ya no quió vel esi sacho,
esas jocis clavás en el techo,
ni esa segureja ni ese cacho e liendro...
¡Pero a vel, señol jues: cuidaito
si alguno de esos
es osao de tocalí a esa cama
ondi ella s'a muerto:
la camita ondí yo la he querío
cuando dambos estábamos güenos;
la camita ondi yo la he cuidiao,
la camita ondí estuvo su cuerpo
cuatro meses vivo
y una nochi muerto!
¡Señol jues: que nenguno sea osao
de tocali a esa cama ni un pelo,
porque allí lo jinco
delanti usté mesmo!
Lleváisoslo todu,
todu, menos eso,
que esas mantas tienin
suól de su cuerpo...
¡y me güelin, me güelin a ella
ca ves que las güelo!..
|
