El desahuciado (segunda parti)
Y ná más yo sólo
enrëao con esto que tengo,
vengan ratos al sol con las tías
enroscao lo mesmo que un perro,
u si no en el corral mancornao
entrí los maeros,
sin jacel ni las sopas que como,
sin ganal ni p'al agua que bebo,
que velgüenza me da que me vean
asín tanto tiempo.
Cuatro vecis quiciás haiga dio
ancá'l curandero,
que me dijo que estaba embargao
y me puso dos parches al pecho
y una bilma de pés y de estopas
en el rengáero.
Y aquí la he tenio
clavá como un perro
¡pa ná!, ¡pa quealsí
con piazos asín de pellejo!
¡Mentira paecí
que la gracia que tieni el tío Cleto
pa los males no le haiga servio
pa acertalmi con estí que tengo!
El domingo me jici el valienti
y me jui p'al güerto
con que a esparegilme
y a jacel p'allí ná do provecho.
¡Cuidaito que jui despacino,
como ustés cuando van a paseo!
Pus me pusí a jacel unos bochis
pa tiral cuatro jabas en ellos,
y aquello eran ansias,
y sudores, ajogo y mareos...
que si asín acontino, me caigo,
rëondo allí mesmo.
Y me viní pa casa ajogao,
sin poel ni siquiá con el cuerpo,
acezando por esas callejas
lo mesmo que un perro,
chúngala mandrángala,
que tardé media tardi lo menos.
¡Me caso en la luna!
|
