Lah quehah de la Calra
Ya me dueli la boca d' idilti
Que me ihu tíu Quicu que huerah
Pa 'l lagal, pa metelti ehta tardi
Embahu ' la muela
El pihcu aditunah
De la biñah Nuebah;
Peru tú, n' ah oyíu, poh tieh
Pu lah cosah de casa sordera.
Al trabahu, no le tieh apegu;
En a' casa... no parah. N' ay cuenta
Que tendrá qu' ehtudial el chiquinu
Y dil a la 'hcuela,
Pa que hechi lah cuentah de casa
Y aprenda pobremah,
Qu' el maehtru qu' angora tenemuh
Tieni mucha cencia
Poh hadiendu dehtracih y colruh
Toítu lo enseña.
Peru a ti del dagal no t' importa,
Ni tienih en cuenta
Qu' uguañotí binu asolanáu
Com' una higuera.
¡Cutaínu, qué ansionih me dan!
¡Probeditu, qué ahoguh me entran
De sabel que lo bidu Palriqui
Uguañazu p' allá pa la siega
Dehmangahaítu
Pol la solahera!
Mah te bali que baigah al güertu,
Y que hagah balañuh de tierra,
Pa ponel huntu al podu unuh chícharih
O unah melonerah
Que dihpuéh bien te guhta comel
En 'a güena mesa.
Eha ya lah ehpáh y loh bahtuh
Y esah cantarenah,
Que na máh mentalah
M' entra denguerreta.
Ehati de cafesih y copah
Y d' engordaerah
De hihuh ahenuh
En ca esa halmerga.
Pah alúu..., no palrih
Que cuasi te pega
Polqu' empuhah lah cosah p' alantri
Y erih hadendera.
Comu no demuih...
Moh comin lah deudah;
Se ban en mahatrah
Loh suorih de la barbechera;
Polque debih el carru entabia
Y lah herramientah
Traíah pa 'l güertu
Pa 'l pihcu alamea.
Comu no hagah máh en 'a casa
Y muih de librea.
Bah a belti odiáu de toh
Y sin una perra.
Alúu beremuh
Si tegu quie cuentah
Esa halmergona,
Esa biboreta
Que te tie ya royíu el sentíu
Y toítu el suol moh se lleba. |
