ESTREMAÚRA

Saniá desahtiva l'alerta al cael las temperaturas pur embahu los 40º. L'aliviu térmicu continuará los próssimus días, aunqu'el martis golverá a h.azel más calol. La provincia de Badahoç superó'l record de cunsumu eléhtricu.

www.elperiodicoextremadura.com

La Cunsehería de Saniá anunció ayel meyudía la dessahtivación del nivel 1 d'alerta por calol, al cael la temperatura pur embahu los 40º de mássima y 21º de mínima ena provincia de Badahoç. Cun ellu, tola región golvió al nivel 0, que se limita a l'información a los ciuanus pa que adohtin midías preventivas. Al largol de la horná n'Estremaúra se percibió un aliviu térmicu, si bien mu ligeru, y las temperaturas oscilun ente los 39º y los 37º

Amás, la preizión del Istitutu Nacional de Meteorología indica qu'oi continuará essi descensu paulatinu, y enas tres capitalis estremeñas las temperaturas se moverán ente los 37º y los 38º graus de mássima y los 20º de mínima. Ista situación s'estenderá al restu de la región, cun bahás d'unu o dos graus enas mínimas.

Enus próssimus días, el goteu a la baha de los termómetrus continuará, sigún Meteorología, h.asta situal las mássimas nel entornu de los 36º y las mínimas alreol 19º, lu que se cunsiera más normal a istas alturas del veranu. Ensín embalgu, pocu va dural esti respiru, ya qu'a partil del lunis cambiará de nuovu la tendencia, y las temperaturas dirán sub·iendu otra vezi h.asta los 38º o 39º.

Del mesmu mou, los índicis de radiación ultravioleta caerán h.asta l'índici nuevi --duranti l'epissodiu más estremu de la ola de calol an estáu en diez -- un nivel que, con tó, sigui siendu mu eleváu, y aconseha non esponessi al sol enas oras centralis del día.

En cuantu a las próssimas selmanas, el meteorólogu de TVE, José Antonio Maldonado, esplicó que nu é previsibli que se repitan situacionis tan estremas comu las que se vivun el veranu passáu, si bien reconoció qu'esta apreciación se basa únicamenti n'estudius estadísticus sob·ri frecuencia d'olas de calol, y non sob·ri osservación y previsión.

RECORD DE CUNSUMU. Comu efehtu indirehtu del calol, y contra lu ocurríu nel territoriu estremeñu que gestiona Iberdrola, la provincia de Badahoç batió'l martis el record estóricu de cunsumu eléhtricu con 314 megawatius por ora, superandu'l mássimu alcançáu l'unu d'agostu del 2003, con 3007 megawatius, sigún los datus aportáus pol direhtol de Sevillana-Endesa en Badahoç, Jesús Rodríguez, quien señaló que ista cifra aumentará aprossimámenti h.asta los 345 megawatius a lu largu de las dos próssimas selmanas, cuandu comencie l'ahtiviá de las empresas cunserveras de las Vegas Bahas.

Rodríguez ah.irmó que h.asta'l momentu non se prouhun problemas nel suministru eléhtricu a causa del calol, y "tampocu asperamus que se prouçan", y añadió que "non prevemus que aigan saturacionis ena redi o problemas d'otru tipu a causa del calol, sarvu situacionis particularis que se puean presental en zonas concretas".

ESTREMAÚRA

Saniái desahtiva a alerta au quel as temperaturas pur embaixu dus 40º. U aliviu térmicu continuará us próssimus días, inda que u martis volverá a fel mais calol. A pruvincia de Badahoç superó u record de cunsumu eléhtricu.

A Cunsehería de Saniái anunció aiel meiudía a dessahtivación du nivel 1 da alerta pur calol, au quel a temperatura pur embaixu dus 40º de mássima y 21º de mínima na pruvincia de Badahoç. Cun issu, to a rexión volviú au nivel 0, que se limita á información aus ciás pa que adohtin midías preventivas. Au lonji da jorná n'Estremáura se percibió un aliviu térmicu, si ben mu lixeiru, y as temperaturas oscilaran entre us 39º y us 37º.

Ademáis, a preizión du Istitutu Nacional de Meteoroloxía indica qu'oji continuará essi descensu paulatinu, y nas tres capitais estremeñas as temperaturas se moverán entre us 37º y us 38º graus de mássima y us 20º de mínima. Ista situación s'estenderá au restu da rexión, cun baixás d'un o dois graus nas mínimas.

Nus próssimus días, u gotéu á baixa dus termómetrus continuará, sigún Meteoroloxía, h.asta situal as mássimas nu entornu dus 36º y as mínimas arriol 19º, u que se cunsiera mais normal a istas alturas du verán. Sin embargu, poicu va dural esti respiru, ia qu'a partil du lunis cambiará de novu a tendencia, y as temperaturas dirán subiendu oitra vé h.asta us 38º o 39º.

Du mismu mou, us índicis de radiación ultravioleta querán h.asta u índici novi -- duranti u epissodiu mais estremu da ola de calol an estáu en dé -- un nivel que, cun tó, sigui sendu mu eleváu, y aconsexa nun esponessi au sol nas oras centrais du día.

En cuantu ás próssimas semás, u meteorólogu de TVE, José Antonio Maldonado, esplicó que nun é previsibli que se repitan situaciós tan estremas cumu as que se viveran u verán passáu, si ben recoñociú que ista apreciación se basa únicamenti n'estudius estadísticus sobri frecuencia d'olas de calol, y non sobri osservación y previsión.

RECORD DE CUNSUMU. Cumu efehtu indireitu du calol, y contra u ocurríu nu territoriu estremeñu que gestiona Iberdrola, a pruvincia de Badahoç batió u martis u record istóricu de cunsumu eléhtricu cun 314 megawatius pur ora, superandu u mássimu alcançáu u ún d'agostu du 2003, cun 3007 megawatius, sigún us datus aportáus pur u direhtol de Sevillana-Endesa en Badahoç, Jesús Rodríguez, quen siñaló que ista cifra aumentará aprossimámenti h.asta us 345 megawatius au largu das dois próssimas semás, cuandu comenci a ahtiviái das empresas cunserveras das Vegas Baixas.

Rodríguez afirmó que h.asta u momentu non se prouxun problemas nu suministru eléhtricu a causa du calol, y "tampoicu esperamus que se prouçan", y añadió que "non prevemus que aian saturaciós na ré o problemas d'oitru tipu a causa du calol, sarvu situaciós particularis qe se puean presental en zonas concretas".

ESTREMAÚRA

Sanidá desahtiva l'alerta al cael les temperatures por embahu los 40º. L'aliviu térmicu continuará los próssimus díes, aunqu'el martis volverá a h.el más calol. La provincia de Badahoç superó'l record de consumu eléhtricu.

La Consehería de Sanidá anunció ayel meyudía la dessahtivación del nivel 1 d'alerta por calol, al cael la temperatura por embahu los 40º de mássima y 21º de mínima ena provincia de Badahoç. Con ellu, tola región volvió al nivel 0, que se limita a la información a los ciudanus pa que adohtin midíes preventives. A lu largu de la horná n'Estremaúra se percibió un aliviu térmicu, si bien mu ligeru, y les temperatures oscilun ente los 39º y los 37º

Amás, la preizión del Istitutu Nacional de Meteorología indica qu'oi continuará essi descensu paulatinu, y enes tres capitales estremeñes les temperatures se moverán ente los 37º y los 38º graus de mássima y los 20º de mínima. Esta situación s'estenderá al restu de la región, con bahaes d'un o dos graus enes mínimes.

Enos próssimus díes, el gotéu a la baha de los termómetrus continuará, sigún Meteorología, h.asta situal les mássimes nel entornu de los 36º y les mínimes alreol 19º, lu que se consiera más normal a estes altures del vranu. Ensín embargu, pocu va dural esti respiru, ya qu'a partil del lunis cambiará de nuevu la tendencia, y les temperatures dirán sub·iendu otra vezi h.asta los 38º o 39º.

Del mesmu mou, los índicis de radiación ultravioleta caerán h.asta l'índici nuevi --duranti l'epissodiu más estremu de la ola de calol an estáu en diez-- un nivel que, con tou, sigui siendu mu eleváu, y aconseha non esponessi al sol enes ores centrales del día.

En cuantu a les próssimes selmanes, el meteorólogu de TVE, José Antonio Maldonado, esplicó que nu é previsibli que se repiten situaciones tan estremes comu les que se vivun el vranu passáu, si bien reconoció qu'esta apreciación se basa únicamenti n'estudius estadísticus sob·ri frecuencia d'oles de calol, y non sob·ri osservación y previsión.

RECORD DE CONSUMU. Comu efehtu indirehtu del calol, y contra lu ocurríu nel territoriu estremeñu que gestiona Iberdrola, la provincia de Badahoç batió'l martis el record estóricu de consumu eléhtricu con 314 megawatius por ora, superandu'l mássimu alcançáu'l 1 d'agostu del 2003, con 3007 megawatius, sigún los datus aportáus pol direhtol de Sevillana-Endesa en Badahoç, Jesús Rodríguez, quien señaló qu'esta cifra aumentará aprossimámenti h.asta los 345 megawatius a lu largu de les dos próssimes selmanes, cuandu comencie l'ahtividá de les empreses conserveres de les Vegues Bahes.

Rodríguez afirmó que h.asta'l momentu non se produhun problemes nel suministru eléhtricu a causa del calol, y "tampocu asperamus que se prouçen", y añadió que "non prevemus que aiguen saturaciones ena redi o problemes d'otru tipu a causa del calol, salvu situaciones particulares que se pueen presental en zones concretes".